TikTok ka konfirmuar për Forbes se disa nga punonjësit e kompanisë në SHBA kanë aftësinë të nxisin shikueshmërinë e videove të caktuara për të “prezantuar personazhet e famshëm apo krijuesit e rinj me komunitetin e TikTok”.
Kjo deklaratë vjen si pjesë e një raporti të publikuar rreth butonit “Heating” të TikTok, i cili mund të përdoret për të vendosur video të caktuara në faqjen For You, duke rritur shikueshmërinë dhe duke anashkaluar algoritmin që e bën aq tërheqës rrjetin social.
Jamie Favazza, një zëdhënës i TikTok, tregoi se rritja e shikimeve në video të përzgjedhura nuk është i vetmi qëllim që kompania ka. TikTok promovon video që ndihmojnë diversitetin e përmbajtjeve të rekomanduara, në mënyrë që në feed-in tuaj të mos shfaqjen video që kanë lidhje vetëm me një temë të caktuar. Favazza shtoi se kompania nuk e bën shpesh herë një veprim të tillë, pasi vetëm .002% e videove në For You janë ndihmuar nga kompania.
Megjithatë, sipas një dokumenti të siguruar nga Forbes kët video përbëjnë në total rreth 1-2% të videove që ju shikoni gjatë ditës.
Ju nuk do të mund ta kuptoni se cilat prej këtyre videove janë nxitur nga kompania, për sa kohë ato nuk shoqërohen me një tabelë që tregon një gjë të tillë. Prej disa vitesh përdorues të ndryshëm akuzonin TikTok se i kanë premtuar politikanëve dhe bizneseve një avantazh të tillë për t’iu bashkuar platformës.
