Google tregoi gjatë kësaj jave se do të zgjerojë llojet e të dhënave personale që mund të fshihen nga rezultatet e kërkimit nëse përdoruesit bëjnë një kërkesë. Nën këto politika të reja, përdoruesit mund të kërkojnë fshirjen e informacionit personal të kontaktit, si përshembull numrin e telefonit, adresën e email-it apo adresën fizike.
“Informacionet personale të kontaktit të shfaqura online mund të përdoren në mënyra të rrezikshme, si përshembull përballja fizike e padëshiruar.” tha Michelle Chang, drejtuesja e politikave globale të Google.
Google tregon se kur kompanisë t’i vijë një kërkesë për fshirjen e informacionit, do të vlerësojë të gjithë përmbajtjen në faqje për të siguruar se nuk po limiton praninë e informacioneve të tjera të rëndësishme, si përshembull artikujt e lajmeve. Mirëpo informacionet publike, si numrat e telefonit të zyrtarëve nuk do të fshihen nga platforma, për sa kohë ato janë publikuar në faqjet zyrtare të qeverisë.
Si pjesë e këtij proçesi, ju duhet të dorëzoni të gjitha pamjet dhe URL që dëshironi të rishikohen nga Google për t’i fshirë. Kompania tregon se nëse e eliminon një përmbajtje nga kërkimet në web, informacioni do të qëndrojë sërisht në website-in që e ka publikuar, dhe mund të gjendet nëse përdoret një tjetër motor kërkimi.
