Nuk ka më nevojë të shkarkosh aplikacionin në treg të zi. Nuk ka më nevojë të aktivizosh VPN dhe të gënjesh aplikacionin se ndodhesh në USA apo Europë. Dhe nuk ke pse të krijosh më adresa emaili fiktive.
Nga dje Spotify është i disponueshëm për Rusinë dhe 12 vende të tjera.
Në faqen zyrtare të platformës lajmërohet se Spotify mbërrin në Rusi dhe për rrjedhojë edhe për Ballkanin. Epo le të themi që Sovjetikët vazhdojnë të na hyjnë në punë.
“Shqipëria, Bjellorusia, Bosnia dhe Hercegovina, Kroacia, Moldavia, Mali i Zi, Maqedonia e Veriut, Rusia, Serbia, Sllovenia dhe Ukraina mund të shijojnë eksperiencën e dëgjimit të 50 milion këngëve, 4 bilion playlista, dhe opsione të personalizuara sipas vendndodhjes.”
Të ardhurit e rinj nga këto 13 tregje do t’i bashkohen 286 milion dëgjuesve të Spotify dhe 130 milion abonentëve Premium. Shkarkimi i aplikacionit të mundëson të dëgjosh këngët sigurisht por veprimet janë të limituara, një abonim me pagesë do të lejojë të zgjedhësh këngën, dhe madje edhe ta shkarkosh atë për dëgjim offline brenda aplikacionit.
Nga ana tjetër ky është një moment shumë i rëndësishëm për artistët e rajonit pasi muzika e tyre do të mund të dëgjohet në një plaftormë masive sa Spotify. Jo vetëm ata të vjetrit por edhe të rinjtë, të cilët do të kenë tashmë në duar strumente për të bashkëvepruar më mirë dhe për të kuptuar audiencën e tyre.
