Ditën e martë Snapchat prezantoi për herë të parë qendrën e kontrollit prindëror, pothuajse 10 muaj pasi një drejtues ekzekutiv nga kompania i tha Kongresit se po zhvillonte mjete për të ndihmuar prindërit që të mbrojnë fëmijët e tyre.
Ky shërbim i ri, i quajtur Family Center, premton që t’i japë prindërve më tepër informacione rreth personave me të cilët adoleshentët po komunikojnë në Snapchat, pa shpërndarë përmbajtjen në këto biseda. Prindërit duhet të krijojnë një adresë të tyren në Snapchat, dhe adoleshentët duhet t’i japin leje atyre për të përdorur këtë shërbim.
“Family Center është dizenjuar për të reflektuar mënyrën se si prindërit ndërveprojnë me fëmijët e tyre në botën reale, ku ata dijnë zakonisht se me cilët persona adoleshentët e tyre shoqërohen, pa parë përmbajtjen e bisedave private.” tha kompania përmes një postimi në blog.
Snap tregon se do të shtojë disa shërbime të reja në Family Center gjatë muajve në vijim. Disa nga to do të përfshijnë mundësinë që prindërit të shikojnë se kush janë miqtë më të rinj të fëmijëve të tyre, të raportojnë në mënyrë konfidenciale adresat që mund të ndërveprojnë me fëmijën e tyre dhe t’i japin mundësinë fëmijëve të njoftojnë prindërit kur raportojnë një përmbajtje apo një adresë.
Kompania tregon se u konsultua me ekspertë të sigurisë online para zhvillimit të këtyre opsioneve.
