Duke filluar nga kjo javë, Snapchat do të nisë të ofrojë një abonim me pagesë të quajtur Snapchat Plus, i cili sjell pranë përdoruesve shërbime ekskluzive dhe akses të hershëm në shërbimet e reja.
Me një çmim prej $3.99 në muaj, kjo kategori abonimi është kryesisht për “personat që shpenzojnë shumicën e kohës së tyre duke komunikuar me miqtë më të afërt në Snapchat”. Kjo është hera e parë që Snapchat tenton të gjenerojë para përveç reklamimit, megjithatë zëvëndës-presidenti i produktit, Jacob Andreou, tregon se nuk pritet që Plus të jetë një burim kryesor fitimesh.
Shërbimet më kryesore që vijnë në Snapchat Plus janë mundësia për të ndërruar stilin e ikonës së aplikacionit, të shikoni se cili prej miqve tuaj ka riparë story-n tuaj, dhe aftësia për të bërë pin chat-in me mikun tuaj më të ngushtë në krye të historisë së chat-eve.
Të gjithë ne do të mendonim se nëse Snap ofron një abonim me pagesë, do të eleminonte të gjitha reklamat në aplikacion për përdoruesit që paguajë. Mirëpo Andreou e mohon një gjë të tillë, duke thënë se “reklamat do të mbeten në bazë të modelit tonë të biznesit për një kohë të gjatë”.
Snap nuk është i vetmi aplikacion që ka prezantuar një kategori të re abonimi me pagesë, pasi dhe Twitter dhe Telegram kanë lançuar një kategori të tillë, kryesish për personat që shpenzojnë shumë kohë në këto aplikacione.
