Më 24 qershor 2025, Presidenti rus Vladimir Putin miratoi një ligj të ri që autorizon krijimin e një aplikacioni shtetëror për komunikim, me synimin për të ulur varësinë e Moskës nga platformat e huaja si Telegram dhe WhatsApp, siç raporton Reuters. Sipas ligjvënësve rusë, aplikacioni i ri do të përfshijë veçori që platformat rivale nuk i ofrojnë, si integrimi me shërbimet shtetërore dhe edukative, si dhe një nivel më të lartë të mbrojtjes së informacionit mes përdoruesve.
Megjithatë, kritikët paralajmërojnë se shtetasit rusë do të detyrohen ta përdorin. Mikhail Kilmarev nga Shoqata për Mbrojtjen e Internetit deklaroi se Rusia ka të ngjarë të ngadalësojë qëllimisht aplikacionet konkurruese për të nxitur përdorimin e atij shtetëror. Në të kaluarën, autoritetet ruse e kanë pranuar publikisht se kanë ngadalësuar aksesin në platforma si YouTube.
Ligji vjen në kuadër të përpjekjeve të Putinit për “sovranitet dixhital” — një strategji që u intensifikua pas largimit të kompanive perëndimore nga Rusia pas pushtimit të Ukrainës në vitin 2022. Që atëherë, Moska ka ndaluar Facebook dhe Instagram dhe ka bllokuar aplikacionet Signal dhe Viber. Tani po diskutohet edhe ndalimi i WhatsApp, me Meta të shpallur si “organizatë ekstremiste” nga Rusia.
Në të njëjtën kohë, SHBA po përballet me shqetësime të ngjashme rreth praktikave të sigurisë së Meta. Shtëpia e Bardhë ndaloi përdorimin e WhatsApp nga personeli qeveritar për shkak të mungesës së transparencës dhe enkriptimit të dobët. Ndërkohë, siguria e aplikacioneve të mesazheve mbetet një çështje kritike në nivel global.
