Prej 2 ditësh, përdoruesit e Instagram kanë raportuar se algoritmi i aplikacionit po i rekomandonte shumë më tepër se zakonisht video të dhunshme, dhe shumë prej tyre mendojnë se sistemi i moderimit të platformës nuk po funksionon siç duhet.
Pas raportimeve të tilla, një zëdhënës i Meta bëri një deklaratë ku tregonte se kompania e kishte zgjidhur problemin. “Ne kemi rregulluar një problem që bëri që disa përdorues të shihnin përmbajtje të dhunshme në feed-in e tyre të Instagram Reels që nuk duhej të rekomandoheshin. Kërkojmë falje për gabimin,” tha një zëdhënës i Metës, megjithatë nuk e bëri të ditur arsyen pas këtij problemi.
Disa përdorues pretenduan se panë një përmbajtje të tillë, madje edhe me “Sensitive Content Control” të Instagram të aktivizuar në cilësimin më të lartë të moderimit.
Një kompani kontraktorësh që ka punuar më parë me Meta shpjegoi se Instagram mbështetet në AI dhe moderimin nga njerëzit për të filtruar përmbajtjet e papërshtatshme. Ndërsa AI zbulon përmbajtjet e papërshtatshme në platformë, moderatorët humanë luajnë një rol tepër të rëndësishëm duke rishikuar këto përmbajtje, për të përcaktuar nëse shkelin politikat e Meta.
Megjithatë, ditën e hënë një numër i madh i këtyre moderatorëve mendohet se janë larguar nga puna për të protestuar ndryshimet e fundit të kushteve të punës dhe politikave të kompanisë. Pa mbikëqyrjen e njerëzve, algoritmi po punon i vetëm, duke filtruar një sasi të vogël të përmbajtjeve, gjë që çoi në rekomandimin më të shumtë të këtyre videove përgjatë 2 ditëve të fundit.
