Një studim i ri i kryer nga University of Bath tregon se mospërdorimi i rrjeteve sociale si Instagram apo TikTok ndihmon në uljen e depresionit dhe ankthit tek përdoruesit.
Dr Jeff Lambert, drejtues i këtij studimi tha: “Rrjete sociale tashmë janë shndërruar në një pjesë të jetës për shumë persona, tepër të dobishme në formimin e tyre dhe në mënyrën se si ndërveprojnë me persona të tjerë. Mirëpo nëse ju shpenzoni shumë orë duke bërë scroll dhe ndiheni se kjo gjë ka një impakt negativ tek ju, ndoshta ka ardhur koha të limitoni përdorimin e tyre.”
Studiuesit i ndanë 154 persona nga mosha 18 – 72 vjeç në dy grupe: njëri që e kishte të ndaluar përdorimin e rrjeteve sociale dhe tjetri që i përdorte ato mesatarisht 8 orë në ditë. Pas periudhës 7 ditore pjesëmarrësit u pyetën në lidhje me nivelet e tyre bazë të ankthit apo depresionit, ndjesisë së mirëqenies, duke përdorur 3 teste të njohura.
Personat të cilët vendosën të largoheshin nga rrjetet sociale për të paktën 7 ditë raportuan se kishin një ndjesi të rritur të mirëqenies. Niveli i depresionit në këtë grup ra nga 7.46 në 4.84 në bazë të Patient Health Questionaire, ndërkohë që ankthi ra nga 6.92 në 5.94.
Më pas Dr Lambert shtoi: “Shumë nga pjesëmarrësit tanë raportuan efekte pozitive pasi bënë një pushim 1 javor nga rrjetet sociale. Kjo gjë sugjeron se edhe një pushim i vogël mund të ketë një impakt të madh në shëndetin mendor të njerëzve.”
