Meta ka treguar se po konsideron të heqë nga tregu evropian aplikacionet e saja më të përdorura, Facebook dhe Instagram nëse nuk do të lejohet transferimi i të dhënave të përdoruesve evropianë në SHBA. Kjo gjë u bë e ditur përmes një raportimi të përvitshëm të publikuar ditën e enjte.
Rregullatorët në Evropë aktualisht po hartojnë një legjislacion të ri i cili do të përcaktojë mënyrën se si të dhënat e qytetarëve në këtë kontinent transferohen përtej oqeanit Atlantik.
Facebook tha: “Nëse nuk adoptohet një tjetër framework për transferimin e të dhënave përtej Atlantikut dhe ne nuk jemi në gjendje të mbështetemi në mënyra të tjera të transferimit të të dhënave nga Evropa në SHBA, atëherë ne nuk do të jemi në gjendje të ofrojmë disa nga produktet tona më të rëndësishme si Facebook dhe Instagram në Evropë.”
Kompania shtoi se ky ndryshim do të prekë në mënyrë të pafavorshme kompaninë, duke përkeqësuar situatën ekonomike të saj.
Nga ana tjetër deputeti Axel Voss tha përmes një postimi në Twitter se “Meta nuk mund të kërcënojë BE në mënyrë që ajo të heqë dorë nga standardet e mbrojtjes së të dhënave të saj”. Ai shtoi gjithashtu se largimi nga BE do të ishte një humbje për Meta-n.
Një zëdhënës i Meta tregoi se kompania që ai përfaqëson mbështetet në transferimin e të dhënave nga BE në SHBA për ofruar një shërbim global.
