Meta ka nisur të testojë shërbimin e ri “Roll Call” në Messenger, i cili është shumë i ngjashëm me BeReal. Ky shërbim u vu re për herë të parë nga Matt Navarra, i cili publikoi në Twitter disa pamje të këtij shërbimi.
Roll Call fton përdoruesit e Messenger të shtojnë një fotografi apo një video momentale kur vjen njoftimi nga aplikacioni. Këta përdorues do të jenë në gjendje të shikojnë fotografitë apo videot e miqve në Roll Call vetëm në qoftë se do të publikojnë vetë një fotografi apo video të tillë.
⚡️FIRST LOOK: Meta is testing its BeReal-style ‘Roll Call’ feature in Messenger pic.twitter.com/UzMkRhba4K
— Matt Navarra (@MattNavarra) February 22, 2023
Ndryshe nga BeReal, ku përdoruesit duhet të shpërndajnë fotografi në një moment të caktuar të ditës, shërbimi i ri i Messenger nuk i kërkon përdoruesve automatikisht publikimin e një BeReal të ri. Një gjë e tillë mund të nisë nga një group chat në çfarëdo orë.
Ju mund të nisni një “sfidë” në grup ku ftoni të gjithë miqtë tuaj të tregojnë me fotografi ose video “drekën e tyre”. Për të inkurajuar pjesëmarrjen, kjo sfidë duhet të plotësohet brenda një afati kohor të caktuar. Sapo një person të nisë sfidën, njoftimi do t’i dërgohet të gjithë personave që marrin pjesë në një group chat. Pasi të keni publikuar fotografinë tuaj, ju do të mund të shikoni fotografitë e personave të tjerë.
Për sa kohë Roll Call është ende në fazën e testimit të brendshëm, nuk dihet ende se kur do të prezantohet gjerësisht për publikun.
