Kanë qenë të shumtë përdoruesit e WhatsApp të cilët kanë nisur të ankohen pasi po marrin shumë mesazhe të ndryshme nga numra të panjohur, pas publikimit të 500 milionë numrave të përdoruesve në dark web. Për fat të mirë bisedat private të këtyre përdoruesve nuk janë prekur nga ky leak.
“Dikush ka arritur të blejë numrat e publikuar nga ky leak dhe ka nisur të na kërkojë mua dhe familjarëve të mi para – unë nuk klikova në asnjë link dhe nuk shpërndava PIN-in tim.” tha një përdorues në Twitter.
Mashtrimet shtohen jashtëzakonisht shumë gjatë sezonit të festave, për shkak se rritet numri i blerjeve online. Ato nuk përdorin një link të infektuar, por shpesh herë ju telefonojnë ose ju bëjnë që t’i telefononi, zakonisht për të anuluar një porosi të bërë.
Sapo shënjestra telefonon numrin e dërguar përmes email-it, kriminelët kibernetik mundohen të tërheqin sa më tepër informacione personale që thuhet se “janë të nevojshme për anulimin e porosisë”. Përdorues të tjerë raportuan gjithashtu dhe mashtrues të tjerë që pretendonin të ishin doktorë nga SHBA, ndërkohë që përdornin një numër telefoni nga Nigeria.
Si mund të mbrojmë veten?
- Mos ju përgjigjni telefonatave apo mesazheve nga numrat e panjohur. Bllokoni të gjithë personat e dyshimtë.
- Aktivizoni 2FA sa më shpejt të jetë e mundur – në WhatsApp Settings -> Account, dhe aktivizoni shërbimin.
- Shkoni në Settings -> Privacy dhe zgjidhni personat që mund të shikojnë foton tuaj të profilit, informacionin “about” dhe detaje të tjera të adresës tuaj. Shpërndajini ato vetëm me persona që njihni
- Mos bieni pre e mesazheve mashtruese që ofrojnë suport. Mashtruesit shpesh herë ofrojnë ndihmën e tyre duke pretenduar si ekspertë që ju ndihmojnë të riktheni adresën tuaj të hakeruar.
