Në 2017, Instagram prezantoi shërbimin e ri për ruajtjen e postimeve në një hapësirë të caktuar të quajtur “collections”, ku përdoruesit mund të organizonin postimet e ruajtura në grupime të ndryshme. Këto grupe ishin private dhe mund të aksesoheshin vetëm nga përdoruesi.
Tashmë Instagram ka prezantuar një shërbim të ri ekstra në “collections”, duke ju lejuar që të bëni bookmark postime dhe t’i ruani ato në një hapësirë të përbashkët me miqtë tuaj. Shërbimi i ri do të quhet “collaborative collections” dhe ka si qëllim të mundësojë ndërlidhjen e personave me interesa të përbashkët nëpërmjet ruajtjes së postimeve në një hapësirë të dedikuar.
Collaborative collections duket se do të shërbejë si një mënyrë e Instagram për të rivalizuar Pinterest që e ka ofruar një shërbim të ngjashëm “Group boards” që nga viti 2018.
“Tashmë kur ju ruani një postim nga feed-i apo nga DM, ju do të shikoni një opsion të ri për krijimin e koleksioneve të përbashkëta.” tha drejtuesi i Instagram, Adam Mosseri ditën e mërkurë në IG Updates Channel. “Ju mund t’i vendosni këtij koleksioni një emër të veçantë dhe ta shpërndani atë me miqtë tuaj. Më pas ato mund të shtojnë përmbajtje të reja në koleksion.”
Çdo pjesëmarrës në këtë koleksion ka mundësinë që të shtojë ose të eleminojë postime nga koleksioni.
