Raportimet e fundit tregojnë se Google ka paguar shuma të mëdha parash për të ruajtur dominancën në treg të Play Store. Këto para i shkuan prodhuesve të smartphone-ve Android dhe developers për t’u siguruar se ato nuk do të lejojnë instalimin e aplikacioneve përmes dyqaneve të palës së tretë.
Në fillim të 2019, Google lançoi “Premier Device Program” që i dha prodhuesve të smartphone-ve një pjesë më të madhe të përfitimeve nëse ato do të bllokonin përdorimin e dyqaneve të palës së tretë në pajisjet e tyre.
Bashkë me mos instalimin e dyqaneve të palës së tretë, Premier Device Program ndaloi gjithashtu instalimin e APK-ve. Në këtë mënyrë përdoruesit kishin ngelur me vetëm Play Store si zgjedhjen e vetme për instalimin e aplikacioneve. Këto informacione u mësuan nga dokumentet e paredaktuara nga beteja gjyqësore mes Epic dhe Google.
Në këto dokumente Epic Games tregoi se programi nuk është bërë publik pasi kompanitë pjesëmarrëse kanë nënshkruar një kontratë konfidencialiteti që i ndalon ato të flasin në publik rreth kontrates pa miratimin e shkruar të Google.
Pjesëmarrësit në këtë program përfituan 12% të përfitimeve nga Google Search, bashkë me 8% që e kishin nga kontrata paraprake. Kompanitë si LG dhe Motorola përfituan dhe 3-6% të përfitimeve që vinin nga shpenzimet që përdoruesit bënin në Google Play Store.
