Google po shton një shërbim të ri të fuqizuar nga inteligjenca artificiale në Google Maps, që do t’i ndihmojë shoferët të kuptojnë kur janë në korsinë e gabuar. Pas më shumë se një dekade zhvillimi të navigimit “turn-by-turn”, kompania më në fund ka adresuar një nga mangësitë më të vjetra të aplikacionit.
Veçoria e re, e quajtur “live lane guidance”, do të përdorë kamerat ballore të makinës për të analizuar shenjat në rrugë në kohë reale. AI do t’i kombinojë këto të dhëna me navigimin e Google Maps për të përcaktuar nëse automjeti ndodhet në korsinë e duhur. Nëse shoferi është në korsinë e gabuar, sistemi do të japë paralajmërime me zë dhe me sinjale vizuale për ta udhëzuar drejt korrigjimit.
Në fazën fillestare, funksioni do të jetë i disponueshëm vetëm në autostrada dhe do të integrohet fillimisht në Polestar 4, një automjet elektrik që përdor sistemin Android Automotive. Prezantimi do të ndodhë “në muajt e ardhshëm” në SHBA dhe Suedi. Google ka konfirmuar gjithashtu se po bashkëpunon me disa prodhues të tjerë makinash për të sjellë këtë teknologji në më shumë modele në të ardhmen.
Këta partnerë pritet të jenë marka që tashmë përdorin ndërfaqen e Google në makinat e tyre, si Volvo, Honda, Nissan, Ford dhe të tjera. Mbështetja për rrugë të zakonshme dhe qytetase do të vijë në një fazë të mëvonshme.
Kjo risi sinjalizon një hap të madh përpara për navigimin inteligjent, duke kombinuar fuqinë e AI-së dhe të dhënave vizuale për ta bërë drejtimin më të sigurt dhe më intuitive, një evolucion i rëndësishëm për Google Maps pas 15 vitesh inovacion të vazhdueshëm.
