Facebook lajmëroi ditën e martë se ka vendosur të ribrandojë kompaninë me emrin “Meta”, gjë që tregon fokusin e kompanisë në ndërtimin e metaverse, një bote virtuale ku njerëzit do të punojnë, luajnë dhe do të lidhen me miqtë e familjarët e tyre.
Meta do të jetë tani kompania mëmë e aplikacioneve Facebook, Instagram, WhatsApp, Messenger dhe Oculus. “Në ADN tonë, ne jemi një kompani që ndërton teknologji që lidh njerëzit me njëri tjetrin, dhe metaverse është drejtimi ku duhet të shkojmë, njësoj siç ishin rrjetet sociale kur ne filluam rrugëtimin tonë.” tha CEO Mark Zuckerberg gjatë Facebook Connect (konferenca e përvitshme AR dhe VR e kompanisë).
Zuckerberg tha se fjala meta vjen nga greqishtja dhe përkthehet “përtej”, gjë që simbolizon se ka gjithmonë më tepër për të krijuar. Në një prezantim të metaverse shiheshin avatars që luanin shah, që merrnin pjesë në koncerte virtuale apo mësonin dhe punonin nga shtëpia e tyre. Gjatë 10 viteve të ardhshme, Zuckerberg beson se këto eksperienca virtuale do të bëhen më të pranishme, dhe beson se metaverse do të numërojë më tepër se 1 miliardë përdorues.
Mirëpo krijimi i një kompanie mëmë të re nuk duket se zgjidh problemet e pafundme të Facebook. Prej disa vitesh, kompania është përballur me kritika të rënda në lidhje me privatësinë, mungesën e veprimit kundër fjalimeve raciste dhe shpërndarjes së keqinformimeve.
