Elon Musk i ka kërkuar punonjësve të mbetur në Twitter gjatë ditës së hënë se ai dëshiron që të shtojë në platformë shërbime të reja si video-telefonatat, telefonatat zanore dhe chat-e në DM të sigurta.
Në zyrat e kompanisë në San Francisco, Musk shfaqi një prezantim me slides të titulluar “Twitter 2.0”. Për herë të parë ky term u përdor ditën e mërkurë gjatë javës së kaluar në një email ku CEO i ri i drejtohej stafit me një ultimatum për të punuar fuqishëm ose për t’u larguar nga puna.
Një regjistrim audio i bërë leak dhe i publikuar nga The Verge zbulon disa nga planet e Musk për të rifreskuar Twitter, duke përfshirë këtu dhe komunikimin e sigurtë. Sipas planeve të reja, DM në platformë do të jenë të enkriptuara, pra tekstet do të mund të lexohen vetëm nga dy personat që po komunikojnë, njësoj si në Telegram, Signal apo WhatsApp.
Musk shtoi gjithashtu se kishte diskutuar me krijuesin e Signal, Moxie Marlinspike (i cili ka qenë një ish-punonjës në Twitter), për të ndihmuar në enkriptimin e DM në Twitter. “Ne dëshirojmë që të bëjmë të mundur që përdoruesit të komunikojnë pa u shqetësuar rreth privatësisë së bisedës së tyre.” tha Musk.
“Duhet të bëjmë të mundur që unë të mos lexoj DM e askujt dhe në qoftë se dikush më ka drejtuar pistoletën në kokë.” shtoi ai.
