Elon Musk i ka treguar investitorëve të ardhshëm se ai ka në plan të pushojë nga puna rreth 75% të stafit të Twitter kur blerja e kompanisë të përfundojë. Ky shkurtim pritet të bëhet gjatë muajve në vijim nga kushdo që do të ketë drejtimin e kompanisë, për shkak të situatës së vështirë.
Kompania tregoi në korrik të këtij viti se ka ngadalësuar shumë proçesin e punësimit të stafit të ri, njësoj si shumë kompani të tjera, për shkak të situatës së vështirë ekonomike në sektorin e teknologjisë.
Mirëpo drama e blerjes së Twitter nga Musk ka ulur moralin e punonjësve ekzistues, të cilët kanë nisur të largohen nga puna në grupe. Dhe pse nga burimet njerëzore tregohet se Twitter nuk ka në plan të largojë një pjesë të mirë të punonjësve, dokumentet e zbuluara shfaqin një situatë krejt ndryshe.
Nën menaxhimin aktual, plani ishte që deri në fund të vitit të largohej nga puna 25% e stafit, ndërkohë raportimi i ri zbuloi se Musk dëshiron të reduktojë stafin prej 7,500 personash të Twitter në vetëm 2,000.
Kjo gjë pritet të ketë një impakt të madh në organizimin e punëve të përditshme në Twitter, duke përfshirë këtu dhe aftësinë për të moderuar përmbajtjet dhe për të luftuar kundër problemeve me sigurinë.
