Ditën e hënë ish-presidenti i SHBA, Donald Trump lançoi një aplikacion të ri i cili tenton të konkurojë me Twitter dhe Facebook. Kjo platformë quhet Truth Social, dhe është një ndër firmat e lançuara nga Trump Media & Technology Group (TMTG), një start-up i cili ka si synim të luftojë kundër “tiranisë së kompanive të mëdha teknologjike.”
Trump përdori jashtëzakonisht shumë rrjetet sociale gjatë fushatës së tij në vitin 2016 dhe përgjatë mandatit si president i SHBA. Mirëpo pas sulmeve në US Capitol nga mbështetësit e tij në 6 janar të vitit të kaluar, Twitter, Facebook dhe YouTube e dënuan Trump nga këto rrjete sociale.
Truth Social u prezantua ditën e hënë me disa probleme teknike, ku përdoruesit po përballeshin me një mesazh “error” dhe e kishin të pamundur të regjistroheshin në aplikacionin që mund të shkarkohet në App Store të Apple.
Të gjithë përdoruesit që arritën të regjistroheshin në platformë u përshëndetën nga lajmi: ”Për shkak të kërkesës së lartë, ne ju kemi vendosur në wait-list tonë. Ne ju duam, dhe ju nuk jeni thjesht një tjetër numër për ne.”
TMTG, përveç Truth Social, ka në plan të krijojë një kompani argëtimi e cila do të rivalizojë Netflix dhe Disney, një kanal lajmesh rival me CNN dhe një sipërmarrje që do të konkurojë me cloud computing të Amazon dhe Google.
