Me sa duket qeveria shqiptare e mori një vendim për sa i përket aplikacionit TikTok. Nëpërmjet një deklarate të bërë para pak çastesh, ministrja e arsimit, Ogerta Manastirliu, bëri të ditur se TikTok do të mbyllet në Shqipëri për 12 muaj, siç ishte diskutuar dhe më parë në deklaratën e kryeministrit Edi Rama gjatë prezantimit të Planit të ri të Veprimit në shkolla.
Ndalimi i aksesimit të TikTok nga përdoruesit shqiptarë do të kryhet brenda një jave ose pak më shumë nga Agjencia e Sigurisë Kibernetike. Siç kemi treguar dhe në raportimet e mëparshme, ndalimi i aksesimit të platformës në vend nuk do të bëhet për shkak të frikës së grumbullimit të të dhënave, por për shkak të materialeve jo të përshtatshme të shpërndara në këtë platformë nga përdoruesit shqiptarë.
Pas takimit me Christine Grahn, drejtuesen e Marrëdhënieve me Qeveritë dhe Politikat Publike të TikTok për Evropën, z. Rama tregoi se qeveria nuk dëshiron ta marrë një vendim të tillë, por do të detyrohet nëse TikTok nuk jep garancitë e nevojshme për filtrimin e përmbajtjeve jo të përshtatshme në platformë.
Kjo ishte një pejsë nga deklarata e znj. Ogerta Manastriliu:
“Kemi analizuar efektet që vijnë nga këto paltforma, kur bëhet fjalë për shëndetin e fëmijëve apo me raste të dhunës fizike. Grupi i punës ka patur në përbërje të gjithë autoritetet përkatëse, duke marrë faktet dhe elementet që kanë patur rëndësi maksimale, kemi rekomanduar mbylljen apo kufizimin e aksesit në Tik Tok, për një periudhë 12 mujorë që do na lejojë marrjen e masave.
Kemi nisur një komunikim me Tik Tok që ka të bëjë me marrjen e masave të mëtejshme, duke vendosur këto filtra ndalojmë promovimin e sjelljeve të padëshirueshme. Është mbyllje e përkohshme e aksesit në Tik Tok, i kemi dhënë vetes deri në 12 muaj kohë, që të marrim të gjitha masat e nevojshme. Do të jetë Agjencia kombëtare e sigurisë kibernetike, brenda disa ditëve do të mundet të realizojë këtë ndërprerje të përkohshme të aksesit në Tik Tok”, tha Manastirliu.
Në fillim të muajit shkurt, pasi u kontaktua nga Geek Room, TikTok tregoi se po bën çdo gjë për të rritur sigurinë në platformë, duke përfshirë edhe folës të gjuhës shqipe, për të fshirë nga platforma përmbajtjet që shkelin politikat e platformës.
Si mendoni ju, a është ky një vendim i drejtë i ndërmarrë nga qeveria vetëm pak javë larg zgjedhjeve parlamentare të 11 majit?
