Një grup studiuesish nga universiteti i Michigan arritën të zhvillonin një panel diellor tërësisht transparent. Ky zhvillim pritet të ketë aplikime të ndryshme në arkitekturë dhe në fusha të tjera si industritë automobilistike. Në të kaluarën ka pasur dhe disa tentativa të tjera për zhvillimin e këtij produkti, por rezultatet nuk ishin të kënaqshme pasi kishin efiçencë të ulët dhe kualitet të dobët.
Ky panel diellor i tejdukshëm mund të vendoset në sipërfaqjen e një dritareje ku luan dy role njëkohësisht, lejon dritën të futet në ambientet e brendshme dhe funksionon si një burim energjie. Teknologjia përdor molekula organike e cila përthith valët e dritës që janë të padukshme për syrin e njeriut, si përshembull rrezet UV dhe infra të kuqe. Më pas drita e kapur transportohet në konturet e panelit, ku konvertohet në energji elektrike me ndihmën e shiritave të hollë të qelizave fotovoltaike solare.
Ky zhvillim është mjaft praktik për aplikim në fasadat e ndërtesave, pasi hapësira vertikale e tyre është zakonisht më e madhe se tarraca. Sigurisht në këtë mënyrë do të arrihej një efiçencë më e lartë dhe pamja do të ishte më estetike. Një tjetër avantazh i saj është dhe integrimi në ndërtesat e vjetra. Për momentin ekipi po punon për përmirësimin e kësaj efiçence nga 1% në të paktën 5%.
