Nëse ju e përdorni telefonin gjatë kohës që jeni në ecje, Google ka krijuar një shërbim enkas për ju. Heads Up do të jetë një shërbim që do t’ju lajmërojë të bëni kujdes në momentin që smartphone-i zbulon se po e përdorni atë ndërkohë që ecni.
Ecja e shpërqëndruar ka qenë dhe mbetet një problem shumë serioz që nga fillimi i përdorimit të smartphone-ve para 15 vitesh. Çdo vit, me mijëra njerëz aksidentohen në rrugë pasi janë teper të përqëndruar në telefonin e tyre dhe nuk bëjnë kujdes kur shkelin në rrugë.
Fillimisht shërbimi Heads Up u vu re për herë të parë në kodin e aplikacionit Digital Wellbeing gjatë vitit të kaluar, por gjatë kësaj jave disa përdorues kanë raportuar se shërbimi ka filluar të funksionojë në smartphone-t e tyre.
Një screenshot që tregon faqjen hyrëse të Heads Up shkruan “Nëse përdorni telefonin ndërkohë që jeni duke ecur, do t’ju vijë një njoftim që ju kërkon të fokusoheni në ambientin përreth jush.” Njoftimet do të jenë të tipit: “Bëj kujdes”, “Shiko para” ose “Fokusohu” , pasi kemi dëgjuar shumë histori të ndryshme ku njerëzit kanë rënë në puseta, janë perplasur me shtyllën ose në rastin më të keq janë aksidentuar nga makinat.
