Në një botë ku qasja në ujë të pijshëm mbetet sfidë serioze për miliona njerëz, kërkimet shkencore po marrin gjithnjë e më shumë forma. Studiues nga University of Texas at Austin kanë prezantuar një koncept futurist: një xhaketë që prodhon ujë të pijshëm direkt nga ajri.
Studimi, i publikuar në Scientific Advances, përshkruan përdorimin e një tekstili special të aftë për të mbledhur lagështinë nga atmosfera dhe për ta shndërruar atë në ujë të pijshëm. Sipas autorit kryesor Guihua Yu, ideja nuk ishte thjesht të përmirësohej teknologjia ekzistuese, por të rishpikej forma e saj. Nëse vetë pëlhura mund të mbledhë ujë nga ajri, atëherë hapet një kapitull i ri për akses personal dhe portativ në ujë.
Ndryshe nga materialet tradicionale që thithin lagështinë, kjo xhaketë përdor “një sistem transporti”, pasi uji i kapur nga ajri kanalizohet drejt njësive të veçanta të grumbullimit. Kjo qasje, sipas bashkautorëve, e bën teknologjinë të funksionojë jo vetëm në kushte laboratorike, por edhe në përdorim real, si veshje. Keith Johnston, bashkautor i studimit, thekson se këto njësi më pas vendosen në një kolektor të palosshëm dhe ngrohen për të prodhuar ujë të pijshëm.
Rezultatet janë mbresëlënëse. Në varësi të nivelit të lagështisë, xhaketa prodhoi nga 400 deri në 900 ml ujë në ditë. Dhe xhaketa është vetëm fillimi. Studiuesit sugjerojnë se i njëjti tekstil mund të përdoret për çanta shpine, tenda apo pajisje të tjera.
Potenciali është i madh, sidomos për ekipe mjekësore emergjente, zona të izoluara, apo edhe për alpinistë dhe sporte ekstreme.
