Ngushtica e Hormuzit është një nga rrugët detare më jetike në botë dhe një nyje kritike për furnizimin global me energji. Një studim i ri nga studiues austriakë paralajmëron se mbyllja e saj nga Irani, nëse zgjat, mund të shkaktojë pasoja shkatërruese për zinxhirët globalë të furnizimit. Sipas simulimeve, deri në $1.2 trilion eksporte mund të preken në rast të një bllokade të zgjatur.
Studimi tregon se ndërprerjet afatshkurtra, rreth dy javë, kanë ndikim të kufizuar. Por nëse mbyllja kalon katër javë, nisin të shfaqen probleme zinxhir, me humbje disproporcionale dhe efekte që përhapen në ekonomi të ndryshme. Veçanërisht e ekspozuar rezulton Mbretëria e Bashkuar, e cila importon rreth 12 miliardë dollarë mallra në vit, ku një pjesë e madhe janë gaz natyror i lëngshëm nga Katari. Studiuesit e konsiderojnë këtë një “dobësi reale”, pasi Britania nuk mund ta zëvendësojë shpejt këtë furnizim, çka do të rrisë çmimet për konsumatorët.
Ngushtica lidh Gjirin Persik me Gjirin e Omanit dhe kontrollohet nga Iran në veri dhe Emiratet Arabe në jug. Ajo është e vetmja dalje detare për shtetet e pasura me naftë të Gjirit, duke përballuar rreth 20% të naftës botërore.
Bashkautor i studimit, Jasper Verschuur nga Delft University of Technology, thekson se ndryshe nga rrugë si Kanali i Suezit, Hormuzi nuk ka alternativa reale devijimi. Simulimet tregojnë se pas 56 ditësh mbylljeje, vonesat dhe bllokimet portuale intensifikohen ndjeshëm.
Ekonomitë aziatike si Kina, India dhe Japonia do të ishin ndër më të prekurat. Studiuesit paralajmërojnë se një mbyllje e zgjatur do të sillte energji më të shtrenjtë, kosto më të larta prodhimi dhe pasoja që mund të zgjasin me muaj, edhe pasi trafiku detar të rifillojë.
