Një trend i ri në TikTok po shqetëson autoritetet dhe është quajtur si “budallallëk dhe i rrezikshëm”. Ai përfshin adoleshentë që përdorin inteligjencën artificiale për të krijuar imazhe false të një personi të pastrehë që pretendohet se ka hyrë në shtëpinë e tyre. Më pas, ata i dërgojnë këto foto prindërve, duke i kërkuar ndihmë atyre pasi “i huaji nuk po largohet”, dhe më pas shpërndajnë përgjigjet e prindërve në TikTok.
Për të krijuar imazhet, përdoruesit fotografojnë ambientet e shtëpisë së tyre dhe përdorin gjeneratorë imazhesh me AI, si ChatGPT ose Gemini AI, për të “shtuar” personin e pastrehë. Disa nga këto imazhe përshkruajnë individin në derë ose ulur në divan, duke shtuar mesazhe të sajuara për të përforcuar “historinë”.
@robynhickey_xx im so glad he found it funny- was lowkey stressed when he said he left work 🫠 #aiprank #aihomelessguyprank #prank ♬ Blue Danube Waltz – London Symphony Orchestra
Policia e Dorset-it në Mbretërinë e Bashkuar ka konfirmuar se ka marrë telefonata nga prindër të shqetësuar, duke dërguar efektivë në vendngjarje, duke humbur kështu burime të vlefshme. Në Facebook, autoritetet apeluan që nëse dikush merr mesazhe të tilla, të verifikojë më parë situatën përpara se të telefonojë urgjencën.
Trendi ka fituar popullaritet në mbarë botën. Autoritetet e kanë përshkruar si “potencialisht të rrezikshëm”, duke theksuar se kjo dehumanizon personat e pastrehë, shkakton panik tek prindërit dhe shpenzon burime të rëndësishme policore. Përveç kësaj, efektivët e dërguar në vendngjarje trajtojnë rastin si një vjedhje reale, duke krijuar situata të mundshme të rrezikshme.
Përdoruesit e TikTok po sfidojnë kufijtë e argëtimit dixhital, por autoritetet paralajmërojnë qartë: ky trend mund të jetë i pafajshëm në dukje, por ka pasoja serioze ligjore dhe etike, dhe nuk duhet kopjuar.
