Pavarësisht përparimeve të mëdha të inteligjencës artificiale, një programues nga Polonia ka treguar se kreativiteti dhe këmbëngulja njerëzore kanë ende peshë. Në konkursin ndërkombëtar AtCoder World Tour Finals 2025 në Tokio, Przemysław Dębiak, me pseudonimin “Psyho”, mposhti modelin e OpenAI, i cili zuri vendin e dytë.
Dębiak, i lodhur dhe me vetëm 10 orë gjumë në tre ditë, tha se e shtyu veten deri në limit, duke përdorur vetëm mjete bazike si Visual Studio Code dhe disa ndihmesa automatike të thjeshta. Ai nuk përdori ndihmë nga AI dhe deklaroi se sfida me OpenAI e motivoi më shumë.
Detyra e konkursit ishte optimizimi i një algoritmi që drejton robotë në një rrjet 30×30 me sa më pak lëvizje. Ndërsa AI e OpenAI-së performoi mirë me metoda të zakonshme, Dębiak gjeti një zgjidhje tërësisht ndryshe dhe më efikase, duke fituar bindshëm.
CEO i OpenAI, Sam Altman, e përgëzoi me një postim në X: “Good job psyho.” OpenAI gjithashtu pranoi humbjen duke shkruar: “Urime kampionit që na ndaloi këtë herë.”
Administratori i garës, Yoichi Iwata, tha se ndonëse AI kishte aftësi të mëdha optimizimi, i mungonte kreativiteti që tregoi Dębiak. Diferenca e tij ndaj AI u rrit nga 5.5% në 9.5%.
Dębiak tha se AI është më e shpejtë në detyra të thjeshta dhe të strukturuara, por në gara të gjata ku çdo gjë ndërtohet nga fillimi, njeriu ka përparësi. Ai pranoi se një sfidë tjetër mund të përfundojë ndryshe — në favor të AI-së.
Edhe pse OpenAI parashikon që AI do t’i tejkalojë njerëzit në kodim së shpejti, fitorja e Dębiak tregon se mendja njerëzore mbetet ende e fuqishme.
