Të dhënat e marra nga Censi 2023 janë përpunuar më në fund dhe janë gjeneruar rezultatet përkatëse. Popullsia totale e Shqipërisë është 2,402,113 banorë, të cilët vijnë nga 755,950 familje të ndryshme ku madhësia mesatare e tyre është me 3.2 anëtarë.
Pra, nëse ne bëjmë një krahasim me herën e fundit kur u zhvillua censi paraardhës, në 2011, vëmë re se numri i popullsisë është tkurrur me pothuajse 17%, 419,831 banorë më pak.
Si shumica e popullatave në Evropë, dhe në tonën vihet re fenomeni i plakjes së popullsisë, pasi në 2023 kishte rreth 667,000 qytetarë që ishin në moshën mbi 60 vjeç, megjithatë mosha mesatare e popullsisë është 42,5 vjeç (35.5 vjeç në 2011).
Besimi
Besimi fetar mysliman është më i përhapuri në Shqipëri, me 1,101,718 banorë që raportuan besimin e tyre. Besimi i dytë më i përhapur është ai katolik me 201,530 banorë, më pas ai ortodoks me 173,645 banorë, ndërkohë që 85,311 banorë raportuan se ishin ateistë. Vlen të theksohet dhe se 244,331 banorë kanë refuzuar t’i përgjigjen kësaj pyetje.
Rënia e popullsisë në qytete
Rënia e popullsisë është një fenomen që ka prekur të gjithë vendin tonë. Shumë qytete të ndryshme kanë regjistruar një reduktim mjaft serioz të numrit të popullatës. I vetmi qytet që ka ruajtur disi stabilitetin është ai i Korçës, i cili gjithashtu ka pësuar një rënie prej rreth 15,000 banorësh në 10 vite diferencë midis dy censeve.
Statusi martesor
Censi 2023 na tregon se në Shqipëri 59,4% e popullatës rezulton i/e martuar, 36,6% janë ende beqar, 7,0% kanë status “I/e ve” dhe 1,4% i/e divorcuar ose e ndarë. Piku i personave të martuar arrihet në grupmoshën 45-64 vjeç (88% të martuar).
31,6% e popullsisë jeton në Tiranë
Pothuajse 1/3 e popullsisë së Shqipërisë është e përqëndruar në qarkun e Tiranës (31,6% e popullsisë), ndërkohë që qarqet e tjera më të populluara janë Fieri (10% e popullsisë), Elbasani (9,7% të popullsisë). Në ekstremin tjetër, Kukësi (2.6%) dhe Gjirokastra (2,5%) kanë përqindjen më të ulët të popullsisë.
Arsimi
Në Shqipëri të dhënat e Censit 2023 tregojnë se janë mbi 204,000 banorë me nivel diplomimi “Master”. Për sa i përket niveleve më të ulta të arsimimit, më shumë se gjysma e popullsisë (55%) në moshën +15 kanë përfunduar arsimin e mesëm ose të lartë. Vetëm 0.6% e popullsisë nuk e ka kryer asnjë nivel të shkollimit.
99.4% e popullsisë në Shqipëri ka kombësi shqiptare
Nga popullsia totale e vendit tonë 99.4% janë me kombësi shqiptare (2,186,917). Në bazë të censit numërohen 23,485 banorë me kombësi greke, 12,375 me kombësi egjyptiane, ndërkohë që përgjigjet e padisponueshme janë të pranishme për 134,351 banorë.
