Elon Musk lajmëroi para disa ditësh se Twitter është përgatitur për një ribrandim në “X”, e cila do të jetë një platformë e gjithëanshme, e ngjashme me WeChat që përdoret në Kinë.
Megjithatë duket se ky ribrandim nuk do të jetë aq i thjeshtë sa Musk e kishte menduar. Problemi qëndron në faktin se Mark Zuckerberg duket se ka regjistruar më parë logon “X” e cila lidhet me shërbimet online të rrjeteve sociale në fushën e argëtimit, video-lojrave dhe aplikacioneve.
Logoja e re e Twitter-it, e cila u lançua të hënën, i ngjan gjithashtu një simboli të përgjithshëm në Unicode të njohur si “mathematical double-struck capital X” që u shtua në Unicode në mars 2001. Unicode është një standard ndërkombëtar kompjuterik në të cilin çdo karakter ose simbol ka një vlerë numerike specifike që mund të përdoret nëpër platforma.
Matthew Scroggs, një studiues në University College London, postoi në Twitter se simboli ishte “përdorur në librat e matematikës që nga vitet ’70“. Simboli nuk ka një përdorim specifik dhe universal, por ndonjëherë përdoret për të treguar një hapësirë ose objekt abstrakt gjeometrik. Logoja e re është gjithashtu pothuajse identike me shkronjat e vogla x në fontin Monotype “Special Alphabet 4“.
Josh Gerben, një avokat i markave tregtare i cili është një partner themelues në firmën ligjore Gerben IP tha se një logo duhej të ishte unike dhe e dallueshme në një farë mënyre për t’u pranuar nga Zyra e Patentave dhe Markave të SHBA-së.
Logoja “X” e Meta në dosjet e saj të markës tregtare duket ndryshe nga ajo që Musk vendosi në Twitter. “X” i Meta duket si dy shigjeta me skajet e rrumbullakosura të drejtuara nga brenda – një e bardhë dhe një blu – ndërsa “X” i Twitter është dallueshëm ndryshe.
