Zvicra ka shpenzuar €2 miliardë dhe ka punuar për më tepër se 14 vite për të ndërtuar një “bateri ujore” e cila tashmë është në gjendje pune, sipas Euronews. Kjo bateri gjendet 600m nën Alpet e Zvicrës.
Një bateri ujore përbëhet nga 2 pishina të mëdha uji që janë të vendosura në lartësi të ndryshme. kur niveli i prodhimit të energjisë është i lartë, energjia e tepërt e papërdorur shkon për të lëvizur ujin nga pishina në lartësinë më të ulët drejt pishinës në lartësinë më të madhe.
Kështu kur kërkesa për energji elektrike rritet, uji në nivelin më të lartë çlirohet dhe kalon përmes turbinave për të gjeneruar elektricitet. Ky koncept mund të duket i ri por ai është shfrytëzuar nga Zvicra prej vitesh.
Bateria e re ujore që është futur në punë gjatë këtij muaji ka një kapacitet prej 20 milionë kWh, e barabartë me baterinë e 400,000 makinave elektrike, dhe ka si qëllim të balancojë rrjetin e shpërndarjes në Zvicër dhe shtete të tjera evropiane. ky impiant përdor 6 turbina dhe mund të gjenerojë rreth 900MW energji.
Mirëpo përse iu deshën Zvicrës 14 vite për ta ndërtuar këtë bateri ujore?
Problemi kryesor që çoi në zgjatjen e afatit të krijimit ishte transportimi i materialeve në kantierin e ndërtimit. Fillimisht inxhinierët duhet të hapnin tunele të reja në Alpe me gjatësi rreth 18km.
Për të rritur kapacitetin e baterisë, lartësia e digës Vieux Emosson u rrit me 20m. Pas gjithë kësaj pune prej 14 vitesh, bateria po funksionon dhe është në gjendje të furnizojë rreth 900,000 shtëpi me energji elektrike njëherazi.
