Bateritë e rikarikueshme fuqizojnë pjesën më të madhe të epokës sonë elektronike. Por ndonëse ato janë të ripërdorshme, ato kanë një jetëgjatësi të kufizuar. Një studim i ri ka identifikuar arsyen pse kjo gjë ndodh.
Laptopët, tabletët dhe telefonat tanë celularë varen nga rikarikimi i baterive. Brenda një baterie me jone litiumi, dy elektroda ruajnë jonet e litiumit; një anodë e ngarkuar pozitivisht dhe një katodë e ngarkuar negativisht. Një elektrolit brenda baterisë lejon që jonet të lëvizin nga anoda në katodë. Kjo lëvizje fillon një zinxhir kimik që çon në lëshimin e elektroneve që krijojnë një ngarkesë. Por një studim i ri nga një ekip në Universitetin Stanford sugjeron se së bashku me jonet e litiumit, janë dhe disa “pasagjerë të padëshiruar” që lëvizin drejt katodës.
Protonet dhe elektronet e hidrogjenit gjithashtu shkëputen nga molekulat në elektrolit. Këto grumbullohen në katodë, që do të thotë se jonet e litiumit nuk janë në gjendje të përcjellin ngarkesën me aq efikasitet. Fuqia që ruajnë këto bateri reduktohet me kalimin e kohës.
Ky depërtim i qëndrueshëm i hidrogjenit nxitet nga një sërë reaksionesh kimike. Gang Wan, një fizikant dhe kimist në Universitetin e Stanfordit, tregoi: “Edhe nëse nuk e përdorni baterinë, ajo humbet energjinë”.
Hidrogjeni është një element i vogël, gjithmonë i pranishëm që është i vështirë për t’u gjurmuar. Për të zbuluar rolin që luante në bateritë me energji elektrike, Wan dhe ekipit të tij duhej të zëvendësonin hidrogjenin me një variant XXL. Ky është deuteriumi, një izotop i hidrogjenit që mban një neutron dhe një proton.
Duke përdorur teknikën e analizës, spektrometrinë e masës dhe imazherinë me rreze X, ekipi i Wan monitoroi deuteriumin ndërsa lëvizte brenda baterisë. Kjo tregoi se hidrogjeni ishte forca lëvizëse që shkakton uljen e fuqisë së baterisë.
Studimi ofron një mënyrë për të përmirësuar bateritë duke synuar ndryshimet e padëshiruara kimike që prodhojnë këto molekula të hidrogjenit që lëvizin.
Më shumë kërkime do të duhet të kryhen për lloje të ndryshme baterish për të përcaktuar se sa universale është çështja. Nëse shumë bateri i nënshtrohen kësaj praktike, kjo mund të çojë në përmirësimin e baterive dhe rritjen e jetëgjatësisë së tyre.
