Ky imazh spektakolar i regjistruar nga teleskopi James Webb shumë thellë në hapësirë duket sikur po reflekton shenjën e gishtit të një personi. Mirëpo sigurisht ky efekt nuk ka ardhur nga shenja e gishtit, por nga një lloj i rrallë ylll dhe nga shoqëruesi i tij.
Secila prej 17 unazave të dukshme krijohen kur dy yjet afrohen me njëra-tjetrën dhe rrymat e gazit që ato lëshojnë bashkohen duke shtypur gazin dhe duke formuar pluhur. Orbita e yjeve bën që ato të bashkohen çdo 8 vite, dhe si rezultat shfaqet kjo pamje e bukur në formën e unazave. Këto dy yje gjenden rreth 5,000 vite dritë larg Tokës dhe njihen si Wolf-Rayet 140.
Rayn Lau, një astronom në National Science Foundation tregoi: ”Ne po shikojmë praninë e një pluhur që është prodhuar prej shekujsh. Kjo pamje na tregon se sa i ndjeshëm teleskopi JW është. Më parë ne mund të shikonim vetëm 2 unaza, duke përdorur teleskopët nga Toka. Tashmë shikojmë të paktën 17 prej tyre.”
Ky lloj ylli është krijuar me një masë të paktën 25 herë më të madhe se Toka dhe tashmë po i afrohet fundit të jetës. Duke u djegur akoma më tepër se në “rininë e tij”, Wolf-Rayet gjeneron erëra të fuqishme që shtyjnë sasi të mëdha gazi në hapësirë. Deri më tani besohet se këto yje mund të kenë gjeneruar gaze më tepër se gjysma e masës së tyre origjinale.
