Që nga momenti kur Elon Musk bleu Twitter vitin e kaluar, ka patur reagime të shumta nga ana e përdoruesve të cilët shpesh herë nuk ishin dakord me vendimet e reja të marra nga miliarderi për ta shndërruar platformën në një hapësirë “totalisht pro fjalës së lirë”.
Nga ana tjetër, një tjetër miliarder mendoi se mund të shfrytëzonte këtë moment dobësie të Twitter, duke krijuar një aplikacion të ri mjaft të ngjashëm i cili do të rivalizojë fuqishëm famën e kësaj platforme. Mark Zuckerberg së bashku me ekipin e punonjësve në Meta kanë punuar për të krijuar aplikacionin e ri Threads, që do të jetë një alternativë për të gjithë përdoruesit e pakënaqur të Twitter.
Mirëpo si do të funksionojë ky aplikacion?
Pasi të instalohet, ai automatikisht do të lidhet me llogarinë tuaj aktive në Instagram. Aplikacioni Threads më pas do të përdorë listën tuaj të miqve në Instagram për të komunikuar. Nëse ju nuk dëshironi të përdorni këtë listë, atëherë aplikacioni do të sugjerojë përdoruesit me të cilët keni ndërvepruar më tepër në Instagram. Më pas, lista që krijoni në aplikacionin Threads do të shtohet gjithashtu në listën tuaj të miqve të ngushtë në Instagram.
Njësoj si në Twitter, përdoruesit do të kenë mundësinë të publikojnë mesazhe në kohë reale drejt ndjekësve të tyre, të cilët mund t’i pëlqejnë, t’i përgjigjen në komente apo dhe t’i shpërndajnë në profilin e tyre.
Një tjetër avantazh që Threads mund të ketë mbi Twitter është protokolli i decentralizuar ku platforma e Meta mbështetet, ActivityPub. Ky protokoll është krijuar nga World Wide Web Consortium, një organizatë ndërkombëtare, e cila i jep përdoruesve më tepër kontroll mbi mënyrën se si të dhënat e tyre përdoren. Megjithatë në momentet e fundit kompania lajmëroi se ky protokoll do të adoptohet më vonë, dhe nuk do të jetë i pranishëm që në lançim.
“Ne kemi dëgjuar shumë krijues dhe figura publike që janë të interesuar të përdorin një platformë që drejtohet në mënyrë të besueshme.” tha Chris Cox, Drejtues i Sektorit të Produkteve në Meta duke kritikuar kështu drejtimin e Twitter që pas blerjes së Musk.
