Activision ka vendosur të përfshijë një modalitet me kohëzgjatje të limituar në Call of Duty: Warzone, ku do të jenë të pranishëm dhe gjigandët Godzilla dhe Kong, duke filluar nga data 11 maj.
Në këtë modalitet, të quajtur Operation Monarch, lojtarët do të konkurojnë për të qenë ekipi i fundit i mbetur gjallë ndërkohë që Godzilla dhe Kong lëvizin rreth ishullit. Dhe pse monstrat “zakonisht nuk janë shumë agresivë” në disa momente të caktuara gjatë lojës mund të fillojnë të sulmojnë menjëherë në një “Titan Frenzy”.
“Pasi të lajmërohet Titan Frenzy, një operator ka 2 opsione: të tërhiqet në mënyrë taktike (të vrapojë sa më larg) nga këto krijesa të rrezikshme ose të tentojë t’i dëmtojë përmes sulmit direkt.” tregon James Mattone në postimin në blog.
Nëse ju arrini të mposhtni monstrat gjatë Titan Frenzy ose fitoni mjaftueshëm “Monarch Intel” gjatë një loje, ju do të fitoni një aftësi Killstreak që ju lejon të përdorni fuqitë e Godzilla apo Kong.
Modaliteti Operation Monarch do të jetë i pranishëm për të gjithë lojtarët deri në datën 25 maj. Gjatë këtij eventi, Activision do të prezantojë dhe disa produkte të reja të inspiruara nga Godzilla dhe Kong, si përshembull disa skins të reja.
