Shprehjen admiruese “Ç’ka bërë shkenca” e përdorim shpesh në biseda, por këtij zbulimi ama i shkon për shtat më së miri.
Në vrapin e madh të botës për të krijuar energji të rinovueshme, të riciklueshme pa abuzuar me resurset natyrore, Universiteti Kombëtar i Singaporit ka arritur të krijojë një material i cili djersën e trupit e kthen në elektricitet.
Skuadra kreative pas kësaj arritjeje premton se ky material mund të thithë lagështirën të paktën 15 herë më shumë nga copat aktuale të thithjes së saj. Ajo fillimisht avullon djersën nga lëkura e më pas merr lagështirën e saj. Për shkak të formulës përbërëse fare të thjeshtë, ajo arrin që ta rilëshojë atë ujë fare shpejtë kur bie në kontakt me dritën e diellit, e mund të rigjenerohet e riciklohet deri në 100 herë.
Së bashku me të vjen edhe një pajisje me 8 pila elektrokimike e cila e përdor këtë material si elektrolit. Secila pilë më pas prodhon 0.57 volt elektricitet me të thithur lagështinë. Energjia e prodhuar nga aparati më pas do të jetë e mjaftueshme për të karikuar një diodë që nxjerr dritë (LED). Pra në një të ardhme ora apo smartphoni mund të karikohet potencialisht edhe nga djersa e trupit të përdoruesit.
Pavarsisht se jemi ende shumë herët për të folur për këtë, ky zbulim ngre një skenë veprimi për avancim në shumë sektorë. Por edhe pa sistemin e prodhimit të elektricitetit, studiuesit po përpiqen që t’a implementojnë teknologjinë në veshjet e përditshme, duke mundësuar kështu vesh-mbathje që do na mbajnë freskët e të pastër edhe në ditët më të nxehta të vitit.
Nëse ky nuk është përparim, nuk dimë ç’tjetër është. Ç’ka bërë shkenca ë?
