Shkencëtarët dhe inxhinierët kanë krijuar një bateri që ka potencialin për të fuqizuar pajisjet për mijëra vite.
Autoriteti i Energjisë Atomike në Mbretërinë e Bashkuar (UKAEA) në Culham, Oxfordshire, bashkëpunoi me Universitetin e Bristolit për të krijuar baterinë e parë në botë me diamant karboni 14. Shkencëtarët thonë se mund të përdoret me pajisje mjekësore si implantet okulare, aparatet e dëgjimit dhe stimuluesit e ritmit, duke minimizuar nevojën për zëvendësime.
Sarah Clark, drejtuese në UKAEA e quajti atë një “mënyrë të sigurt dhe të qëndrueshme” për të siguruar energji të vazhdueshme. Ajo shtoi: “Ato janë një teknologji në zhvillim që përdorin një diamant artificial për të mbështjellë në mënyrë të sigurtë sasi të vogla karboni-14“.
Si funksionon?
Bateria përdor karbon-14, një izotop radioaktiv të karbonit, i cili ka një gjysmë-jetë prej 5700 vitesh që do të thotë se bateria do të ruajë gjysmën e fuqisë së saj edhe pas mijëra vjetësh. Bateritë e prototipit janë 10mm x 10mm me trashësi deri në 0.5mm. Karboni-14 u zgjodh sepse lëshon një rrezatim me rreze të shkurtër, i cili absorbohet shpejt nga çdo material i ngurtë. Ai mbahet në mënyrë të sigurt brenda një diamanti – substanca më e fortë e njohur për njerëzimin – që do të thotë se asnjë rrezatim me rreze të shkurtër nuk mund të shpëtojë.
Funksionon në mënyrë të ngjashme me panelet diellore, por në vend të përdorimit të grimcave të dritës, ai kap elektronet që lëvizin shpejt nga brenda strukturës së diamantit. Bateria mund të përdoret gjithashtu në mjedise ekstreme – si në hapësirë ashtu edhe në tokë – ku nuk është praktike të zëvendësohen bateritë konvencionale.
Profesor Tom Scott, nga Universiteti i Bristolit, tha: “Teknologjia jonë e mikrofuqisë mund të mbështesë një sërë aplikacionesh të rëndësishme nga teknologjitë hapësinore dhe pajisjet e sigurisë deri te implantet mjekësore. Ne jemi të ngazëllyer që jemi në gjendje të eksplorojmë të gjitha këto mundësi, duke punuar me partnerë në industri dhe kërkime, gjatë viteve të ardhshme.”
