Kur flasim për nostalgji video-lojrash nuk ka si Need For Speed dhe makinat klasike të secilës gjeneratë. Ama nga gjithë versionet e lojës të gjithë biem dakort se nuk ka makinë më ikonike se E46 BMW M3 GTR tek Most Wanted.

Te interneti i lagjes, tek PC personal apo në Xbox, mezor prisnim të ktheheshim nga shkolla për të shkuar në Rockport, për të kapur kreun e listës së zezë, nga gara në garë, nga polici në polic derisa ti rimerrnim Razor-it M3-shin Bardh e Blu.

Most Wanted mbetet në zemrat e të gjithëve. Por padyshim askujt më shumë se sa Odonata Cinema dhe Kostantin Komal.
Kostantini, një fans i çmendur nga Rusia ka vendosur të rikrijojë makinën ikonë e cila për hir të së vërtetës nuk është një M3 por nje 330ci, ose të paktën kështu e ka nisur jetën.

Djemtë kanë vendosur të krijojnë një video ku kanë përfshirë të gjitha grafikat e Most Wanted, në vozitje të lirë dhe disa gara të thjeshta. Ne sigurisht që nuk derdhëm asnjë pikë loti kur rikujtuam këngët e vjetra, po ti një pako facoleta mbaje afër se nuk i dihet.
Në video marrin pjesë edhe yje të tjera të gjeneratës si MK4 Toyota Supra, Porsche Cayman S, Mazda RX-8, MK5 Volkswagen GTI dhe Mitsubishi Lancer Evolution VII.

Për më tepër kanë vendosur të përfshijnë edhe një përndjekje policie nga një Mustang, duke bërë të vetmin përjashtim nga kushtet e lojës, pasi policia e Rockport nuk kishte makina të tilla. Disa lloje Cruisers, Rhino SUV deri tek Corvette C6 i Sergeant Cross por kurrë Mustang.

Për të parë se si do të dukej NFS Most Wanted në jetën reale ndiq videon më poshtë.